Ministri i Financave, Hekuran Murati dje u propozoi deputetëve që të gjitha komunat t’ua falin 100 eurot e para secilit tatimpagues të tatimit në pronë. E për këtë Bajrami në një konferencë për media tha se propozimi i Muratit është amatorizëm politikë dhe nuk e ka idenë si funksionon ekonomia.
“Në kohën e rritjes së paprecedent të çmimeve qeveria e paaftë e ka rritur bazën tatimore në pronë. Kjo rritje është rezultat i drejtpërdrejtë i vlerësimit të pronave nga ana e Ministrisë së Financave. Aktualisht, Kosova është duke përjetuar një krizë ekonomike ku qytetarëve u janë rritur vetëm çmimet, nuk ka lëvizje të pagave, të pensioneve dhe të hyrave. Veprimi i rritjes së bazës tatimore është papërgjegjësi, arrogancë nga ana e kësaj Qeverie e cila po shihet se tashmë çdo ditë i ka braktisur qytetarët. Propozimi i ministrit Murati është amatorizëm politik dhe shenjë e qartë e paaftësisë së tij, ai nuk e ka idenë se si funksionon ekonomia”, ka deklaruar ajo.
Po ashtu, Bajrami listoi tri kërkesa që ka LDK-ja për Ministrinë e Financave.
“1. LDK-ja kërkon nga Ministria e Financave që me vendim të veçantë të pezullojë aplikimin e rivlerësimit dhe fundit të patundshmërive në vend dhe faturat e vitit 2023 të llogariten sipas vlerësimeve të bëra para vitit 2022; 2. MF-ja të procedojë sa më parë ligjin e ri për tatimin e ri në pronë.; 3. MF-ja përmes departamentit të tatimit në pronë në bashkëpunim me të gjitha komunat gjatë vitit 2023 të bëjë rishikimin e plotë të procesit të rivlerësimit të pronave pas përcaktimit të zonave që marrin parasysh zhvillimin e vendbanimeve”, ka thënë ajo.
Ndërkaq, Bajrami shtoi se kërkesat e tyre do t’i paraqesin në formë të rezolutës në një debat parlamentar.
“Kërkesat tona do i paraqesim në Komisionin për Buxhet, Financa, Punë dhe Transfere dhe gjithashtu do i paraqesim në formë të rezolutës në një debat parlamentar i cili do të organizohet në një afat sa më të shkurt të mundshëm”, përfundoi ajo. /Teve1.info/
