I biri i tij, Lulzim Geci ka rrëfyer në emisionin “Ditari” në tëvë1 se si kishte ndodhur ngjarja.
Ai tregoi se fillimisht mësuesi kishte larguar nxënësit nga shkolla pasi kishte marrë informacione se ata janë të rrezikuar nga forcat serbe.
“Foto që është e vendosur është shkolla ku ka qenë mësuesi në atë kohë. Nga ana e djathtë shkolla që ka qenë, kurse përballë shkollës ku ka qenë zyra e drejtorit dhe dy klasë tjera ku atë ditë 26 nëntor pas luftimeve që janë zhvilluar në Rezallë mes UÇK-së që kanë qenë të ditura për ne dhe policisë serbe kanë bërë thirrje që mësuesi duhet t’i lirojë nxënësit për shkak të rreziqeve që mundet me pas nga policia serbe”, tha ai.
Por, ai rrëfen se Halit Geci pasi i ka larguar nxënësit është kthyer në shkollë në mënyrë që t’i largojë edhe kolegët e tij nga shkolla.
Pikërisht në atë moment, siç thotë ai, forcat serbe pas disfatave nga UÇK-ja, derisa po largoheshin kishin kthyer tytat e pushkëve drejt shkollës ku ishin plagosur rëndë dy mësuesit, ku njëri fatkeqësisht kishte vdekur.
“Pasi që i ka lëshu nxënsat ka shkuar prapë në shkollë për shkak se i kanë mbet disa kolegë që kanë qenë me shku më larg… Policia serbe sipas informacioneve që i kemi marrë pas disfatave që i kanë pas me UÇK-në në kthim e sipër kanë filluar për sigurinë e tyre të shtiejnë në të gjitha drejtimet e rrugëve dhe lagjes Geci. Kur kanë ardhur në drejtim të shkollës ata kanë pasur edhe tytat e mitralozave nga autoblindat kanë shti në drejtim të shkollës ku një nga plumbat që e ka godit tehin e dritares ka qenë fatal për babain tim ku fillimisht është plagos mësuesi Shaban Rreci dhe është plagos rëndë edhe babai i cili pas një kohe që kanë dërgu në spital, dikur rreth 22:00 të mbrëmjes ka ndërru jetë”, shtoi ai.
Tutje, Lulzimi tregon edhe momentin kur ka marrë lajmin për vdekjen e babait, teksa kujton përshëndetjen e fundit me të.
“Në mendje e kam përshëndetjen e tij të fundit karshi derës së hyrjes, veç përshëndetje kemi pasur me dorë prej së largu dhe ajo më ka mbet në mendje… Unë isha në qytet një kushëri i mi e takon në rrugë Fatmir Gecin më thotë Lul ku ishe i thashë isha në provim, po vazhdoj për në shtëpi. Tha është dashur me ec pak se mësuesi Halit është plagu më lehtë kurse Shaban Rreci unë e takoj i them çka u bë, tha jo jam grrithë por Halili pak më rëndë edhe kam shkuar te mjeku në qytet bashkë me axhën e kemi taku na ka çu deri në Mitrovicë në spital para hyrjes mirëpo aty fatkeqësisht nuk kemi mujt me hy me i qëndru afër”, tregoi ai.
