Murati përmes një postimi në Facebook, duke përmendur disa nga vendimet që ka marrë Qeveria si ndihmë ndaj qytetarëve, është shprehur se do të vazhdojnë më përkrahje, pasi siç ka thënë ai, kjo qeveri është në anën e qytetarëve.
“Në total, si përgjigje ndaj rritjes së çmimeve kemi ndarë rreth 190 milionë euro, vetëm në 4 muajt e fundit. Dhe do të vazhdojmë mbështetjen ndaj qytetarëve sepse kjo qeveri është në anën e qytetarëve. Madje, me nivelin e mbështetjes mund të krahasohemi edhe me shtete shumë më të forta ekonomikisht si Franca e Austria”,ka shkruar Murati, përcjellë tëvë1.info.
Ai ka thënë se opozita po fajëson ekzekutivin edhe për ngritjen e çmimeve globale.
“Por nëse i pyet opozitën, ata do të thonë se qeveria nuk po bën asgjë. Madje, edhe fajin për rritjen globale të çmimeve tentojnë t’ia mveshin kësaj qeverie. Por, se si do të kishin qeverisur ata, mjafton të shikohen statistikat e inflacionit. Përkundër kritikave e përshtypjes së krijuar, viti 2021 mezi arrin të futet në vendin e pestë, nëse i krahasojmë vitet me nivelin më të lartë të inflacionit mesatar vjetor. Të dhënat janë marrë nga ASK”,ka shkruar Murati.
