Kryetarja e Forumit të Gruas të LDK-së, Jehona Lushaku- Sadriu tha se Qeveria është përgjegjëse për mos gjetjen e një zgjidhje për mësimdhënësit dhe për të filluar procesi i rregullt mësimor, shkruan teve1.info.
“Fakt është që Qeveria nuk po dialogon dhe nuk ka arritur që të prodhojë një zgjidhje, fakti është që shkollat janë të mbyllura në gjithë Kosovën dhe procesi mësimor ka një kosto enorme në kuptimin e orëve, në ndikimit tek nxënësit dhe kjo nuk është diçka që mund të riparohet. Asnjë zëvendësim i orëve dhe asnjë proces shtesë nuk mund ta zëvendësoj këtë humbje dhe për këtë ne mendojmë që Qeveria është përgjegjëse. Qeveria është përgjegjëse për mos tregimin e ndjeshmërisë ndaj kategorive të caktuara në këtë rast ndaj mësimdhënësve dhe shërbyesve publik dhe mund të them që humbës jemi të gjithë ne qytetarët e Kosovës”, tha ajo.
Tutje gjatë konferencës, Lushaku Sadriu theksoi disa kërkesa të LDK-së drejtuar Qeverisë Kurti.
“Ne kërkojmë përfundshmit që fëmijët të kthehen menjëherë në shkolla, që qeveria të gjejë një zgjidhje të menjëhershme, që nesër të mundësojë që fëmijët të shkojnë në shkolla dhe të jenë pjesë e rregullt e procesit mësimor. Kërkojmë që kjo Qeveri të gjejë zgjidhje të menjëhershme dhe për shërbyesit civil, për mësimdhënësit dhe të zhbllokojë sistemet shtetërore dhe të ketë mirëkuptim për krizën ekonomike nëpër të cilën po kalojmë”, shtoi ajo një fund./Teve1.info/
