Prokuroria Themelore në Prizren ka ngritur aktakuzë dhe ka kërkuar dënimin sipas ligjit në fuqi ndaj E.L. me dyshimin se e ka mashtruar të dëmtuarin Sh.R. të cilit ia ka marrë 9 mijë e 650 Euro në këmbim të punësimit të resë së tij në QKUK, raporton teve1.info
Sipas Prokurorisë së Prizrenit, i dyshuari E.L. i cili është paraqitur si mjek, i ka kërkuar të holla në këmbim të punësimit të nuses së djalit të tij, Sh.R. duke i marrë këtij të fundit njëherë 4 mijë dhe herën tjetër 5 mijë e 650 Euro.
Me këtë vepror sipas Prokurorisë, i pandehuri E.L. e ka kryer veprën penale “Mashtrimi” sipas Kodit Penal të Republikës së Kosovës.
I dyshuari gjendet në paraburgim që nga data 8 shkurt.
“Sipas aktakuzës, nga data e pavërtetuar gjatë muajit maj të vitit 2021 e në vazhdimësi deri në muajin nëntor të vitit 2021, në njërin prej lokaleve në fshatin Korishë, Komuna e Prizrenit, i pandehuri E.L., përmes paraqitjes së fakteve të rreme dhe me qëllim të përfitimit të kundërligjshëm të dobisë pasurore për vete, e mashtron duke e vënë në lajthim të dëmtuarin Sh.R., dhe me këtë e nxit të kryejë veprim në dëm të pasurisë së tij, në atë mënyrë i pandehuri shkon si klient në lokalin e lartpërmendur pronë e të dëmtuarit, të cilit i prezantohet si mjek që punon në QKUK në Prishtinë, dhe i dëmtuari e njofton të pandehurin se nusja e tij përkatësisht bashkëshortja e djalit të tij, me profesion është infermiere dhe është e papunë dhe dëshiron që e njëjta të punësohet si infermiere në Spitalin e Përgjithshëm të Prizrenit. I pandehuri E.L., e njofton të dëmtuarin se ka njerëz që munden ta punësojnë nusen e djalit, duke kërkuar nga i dëmtuari të holla me qëllim të punësimit të nuses së tij, ku i pandehuri gjatë muajit maj të vitit 2021, takohet në lokalin e të dëmtuarit nga i cili në emër të punësimit të nuses së tij pranon shumën prej 4.000€, dhe i pandehuri pasi i merr këto të holla, vazhdon të kërkojë të holla nga i dëmtuari kinse për nevoja të tij personale, ku i dëmtuari nga muaji qershor të vitit 2021 deri në muajin nëntor të vitit 2021, në periudha të ndryshme kohore të pandehurit në disa pjesë i jep të holla në vlerë prej 5.650€, dhe i pandehuri pas pranimit të hollave, nuk arrin ta punësoj bashkëshorten e djalit të të dëmtuarit, dhe të hollat që i ka marrë në emër të këtij shërbimi të premtuar si dhe të hollat që i kishte marrë kinse për gjëra të tij personale, nuk i’a kthen të dëmtuarit, me të cilat veprime të dëmtuarit i shkakton dëm material në vlerë prej 9.650 €”, thuhet në komunikatën e Prokurorisë.
