Klinaku ka kërkuar nga policia që të ruajnë hyrjen e objektit të OVL-së së UÇK-së.
Këtë kërkesë Klinaku e ka arsyetuar me sipas tij, faktin që dikush tri herë ka hyrë dhe ka sjellë dosje të Gjykatës Speciale në këtë objekt.
Ai ka shkruar se kanë kaluar 24 orë nga kërkesa dhe nuk ka marrë përgjigje.
‘Siç jeni të informuar, në objektin e Organizatave të dala nga lufta e UÇK-së, në rrugën e UÇK-së në Prishtinë, ka pasur zhvillime rreth dosjeve të Gjykatës Speciale me seli në Hagë, thënë më konkretisht, një person i maskuar për tri herë me radhë i ka sjellur ato dosje në Organizatën e Veteranëve të Luftës së UÇK-së, gjë që për këtë, për më shumë se dy vite, në mënyrë të pafajshme po mbahen në paraburgim krerët e Organizatës sonë”, ka shkruar Klinaku.
Po ashtu ai këtë kërkesë e arsyeton me raportimet e një mediumi francez se një gjyqtari të Speciales i është vjedhur llaptopi me të dhëna sensitive.
“Poashtu, siç është paraqitur në mediat tona e që e ka publikuar një gazetë franceze, ka pasur grabitje në Paris dhe i është vjedhur laptopi një gjyqtari të Speciales me të dhëna sensitive, prandaj kërkojmë nga Ju që të merrni masat e duhura për ta ruajtur objektin apo hyrjen e ndërtesës sonë, me qëllim që të mos përsëriten ngjarjet e shtatorit të vitit 2020”, ka shkruar Klinaku.
Televizioni e ka pyetur Gjykatën Speciale për raportimet e mediumit francez se një gjyqtari të Speciales i ishte vjedhur llaptopi me të dhëna sensitive, por Dhomat e Specializuara kanë bërë të ditur se nuk i komentojnë raportimet e mediave.
