Lidhur me mos emërimin e drejtorit të ri deri më tani ka reaguar kryetari i Rinisë së Lëvizjes Vetëvendosje në Vushtrri, Mursel Sadiku.
Ai ka shkruar që në ditën ndërkombëtare të arsimit janë përkujdesur ta sjellin një drejtor “kukull” pasi që sipas tij kryetari i Komunës së Vushtrrisë, Ferit Idrizi nuk ka arritur ta emëroj ende.
“Meqenëse Kryetari për gati dy muaj nuk arriti të emëroj drejtorin e arsimit, ne sot në ditën ndërkombëtare të arsimit u kujdesem për të. Sot para komunës i sjellim një “kukull” të cilin mund të e emëroj drejtor. “Kukulla” është drejtori perfekt, ai nuk kundërshton, nuk ka mendim ndryshe dhe pranon çdo vendim për punësim që e merr partia”, ka shkruar Murseli.
Aktivisti i VV-së ka thënë se beson që “kukulla” që ata kanë sjellë para objektit të komunës do të jetë drejtori me performancën më të mirë në këtë qeverisje teksa ka thënë se kryetarit të Vushtrrisë i duhet aprovimi i Sami Lushtakut për emërimin e drejtori të ri.
“Ne besojmë fuqishëm që “kukulla” do të jetë drejtori me performancen më të mirë në këtë qeverisje. U kujdesëm të i përkujtojmë skandalet e shumta në DKA. Kryetarit i duhet aprovimi i Sami Lushtakut prandaj u vonua dy muaj”, ka shkruar Murseli.
Nga ana tjetër lidhur me mos emërimin e drejtorit të ri të arsimit ka reaguar edhe asamblisti i Lidhjes Demokratike të Kosovës, Shkelzen Xhaferi.
Në një prononcim për teve1.info, Xhaferi e ka akuzuar kryetarin Idrizi duke thënë se në vitin e parë të qeverisjes së tij ka konkurse te anuluara, nepotizëm dhe dorëheqje të drejtoreshës së DKA.
“Në fushatë premtimi kryesor i z. Idrizi ka qenë Arsimi, sepse ai vetë ka thënë që vie nga kjo fushë dhe e ka cilësuar vetën si ekspert i arsimit. Të paktën në atë kohë kështu deklaronte kryetari ndërsa vetëm një vit pas marrjes së mandatit, ka konkurse te anuluara, nepotizëm dhe dorëheqje të drejtoreshës. Po bëhen dy muaj pa drejtor te DKA dhe tani po shihet sa me prioritet e ka PDK arsimin në Vushtrri”, ka thënë Xhaferi.
Ndërkohë kujtojmë se që nga marrja e mandatit qeverisës të kryetarit të ri Ferit Idrizi në Vushtrri janë ndërruar tre drejtorë të drejtorive komunale.
