Lajmet që vijnë nga Norvegjia nuk janë aspak pozitive për Arsenalin.
Ndërsa Martin Odegaard po vazhdon rikuperimin nga një dëmtim në gju, trajneri i kombëtares norvegjeze, Stole Solbakken, ka lënë të kuptohet se rikthimi i tij në fushë mund të zgjasë më shumë se sa ishte parashikuar fillimisht.
Kapiteni i “Topçinjve” pësoi një këputje të ligamentit medial kolateral në gjurin e majtë, dëmtim që pritej ta mbante jashtë fushave për rreth gjashtë javë. Megjithatë, me afrimin e pushimit ndërkombëtar, Solbakken deklaroi se lojtari i tij është “ende shumë larg rikthimit”.
Pavarësisht situatës, organizatori 26-vjeçar i është bashkuar kombëtares norvegjeze, e cila po synon kualifikimin në Kupën e Botës për herë të parë që nga viti 1998.
“Progresi i tij është i qëndrueshëm, por ai ende ka një rrugë të gjatë për të bërë,” tha Solbakken përpara ndeshjeve kundër Estonisë dhe Italisë.
