Emisari evropian për dialogun Kosovë-Serbi, Miroslav Lajçak ka bërë një përmbledhje të aktiviteteve që ka zhvilluar javën që lamë pas.
Lajçak në Facebook ka treguar se ka qenë pjesëmarrës në Forumin e Diplomacisë së Antalias në Turqi, si dhe një vizitë në qytetin belg Bryzh, ku tha se ka mbajtur një ligjëratë me diplomatët e rinj për përvojën e tij aktuale dhe të kaluar si Përfaqësues Special i BE-së.
Por, Lajçaku tha se çështja kryesore për të ka qenë ajo në Bruksel javën e kaluar, gjegjësisht takimi mes delegacioneve të Kosovës dhe Serbisë, “për gjetjen e përgjigjeve për pyetjet e hapura për vendimin e fundit të Bankës Qendrore të Kosovës për operimin me para të gatshme – më konkretisht çështjen e ndihmës së Serbisë për njerëzit që jetojnë në Kosovë”.
Me këtë rast, ai ka paralajmëruar një takim me kryenegociatorin e Kosovës, Besnik Bislimi.
“Pika kryesore e agjendës sime në Bruksel javën e kaluar ishte takimi ndërmjet përfaqësuesve të Kosovës dhe Serbisë për gjetjen e përgjigjeve për pyetjet e hapura për vendimin e fundit të Bankës Qendrore të Kosovës për operimin me para të gatshme – më konkretisht çështjen e ndihmës së Serbisë për njerëzit që jetojnë në Kosovë. Përshëndeta angazhimin e të dy delegacioneve për t’u angazhuar në mënyrë konstruktive në gjetjen e një zgjidhjeje të qëndrueshme për komunitetet e prekura. Takimi ishte një hap i parë i rëndësishëm; megjithatë, mbeten shumë pyetje politike dhe do të nevojiten bisedime shtesë në ditët në vijim. Kjo është arsyeja pse si hap i menjëhershëm i ardhshëm do të jetë një diskutim vijues me zëvendëskryeministrin e parë dhe kryenegociator të Kosovës Besnik Bislimi”, tha ai./teve1.info./
