Këto deklarata ai i ka bërë në Beograd, teksa lidhur me kërcënimet e presidentit serb, Aleksandar Vuçiq, nuk ka dashur t’i komentojë, raporton “N1”.
“Kemi pasur diskutim shumë serioz mbrëmë për situatën dhe sigurisht duhet të shikojmë për zgjidhje nëpërmjet dialogut dhe jo konfrontimeve”, ka thënë Lajçak.
Sipas tij, tashmë është një situatë e re që ia ka ndryshuar planet e vizitës në rajon.
“Kam ardhur në rajon për ta përgatitur takimin e ardhshëm të liderëve dhe të flas për progresin dhe normalizimin e raporteve dhe tani duhet të zgjidhim këtë situatë. Nuk duhet të lejojmë të ketë krizë”, ka thënë ai.
Ndryshe, para se të vizitonte Serbinë, sllovaku qëndroi në Kosovë nga ku u shpreh optimist për një takim të lartë mes kryeministrit kosovar, Albin Kurtit dhe Vuçiqit, para pushimeve të verës.
Ndërkaq, pasditen e së mërkurës Qeveria e Kosovës vendosi që të nisë me zbatimin e masës së reciprocitetit për letërnjoftimet e shtetasve serbë që hyjnë në Kosovë.
Në mbledhjen elektronike të ekzekutivit është vendosur që qytetarët me dokumente të Serbisë do të pajisen me një fletë-deklarim, njëjtë siç bëjnë autoritetet serbe për qytetarët e Kosovës, të cilët hyjnë në Serbi./teve1.info/