Përmes një postimi në Twitter, ai tha se kanë diskutuar për normalizimin e marrëdhënieve mes dy vendeve si dhe kthimin e serbëve të Kosovës në institucione.
“Sot në Beograd diskutova rrugën përpara për normalizimin e marrëdhënieve si vazhdim i takimeve të fundit të Dialogut me@predsednikrs @avucic. Ne folëm edhe për çështjet aktuale, duke përfshirë kthimin e serbëve të Kosovës në institucionet e Kosovës, Udhërrëfyesin e Energjisë dhe personat e pagjetur”, shkroi ai.
In Belgrade today, I discussed the way forward on normalisation of relations as a follow-up to the last Dialogue meetings with @predsednikrs @avucic. We also spoke about current issues, including return of Kosovo Serbs to Kosovo institutions, Energy Roadmap and missing persons. pic.twitter.com/NlhE9bfOxm
— Miroslav Lajčák (@MiroslavLajcak) December 5, 2022
Ndërkaq tëvë1 ka mësuar përmes burimeve se Lajçak do të qëndrojë të martën në Prishtinë ku do të takohet me kryeministrin e Kosovës, Albin Kurti.
Ndryshe, takimi i fundit mes Kurtit dhe Lajçak ishte në Bruksel më 21 nëntor ku pjesëmarrës ishin edhe Shefi për Politikë të Jashtme i BE-së, Josep Borrell dhe presidenti serb, Aleksandar Vuçiq.
Në këtë takim ishte diskutuar mundësia e gjetjes së një zgjidhjeje për konvertimin e targave ilegale serbe që qarkullojnë në Kosovë, por që nuk ishte arritur ndonjë dakordim.
Pas këtij takimi, Borrell në një konferencë për media kishte akuzuar Kosovën se nuk kishte pranuar propozimin për zgjidhjen e kësaj çështjeje.
Ndërkaq, më 23 nëntor kryenegociatori kosovar, Besnik Bislimi dhe ai serb, Petar Petkoviq kanë arritur marrëveshje për targa.
Në një postim në Twitter, Borrelli bëri të ditur se Serbia nuk do lëshojë targa me emërtimet e qyteteve të Kosovës, e Kosova do të ndërpresë veprimet e mëtejshme në lidhje me riregjistrimin e automjeteve.
