Por, këtë herë po e shoqëronin edhe Jens Plötner, i dërguar i kancelarit gjerman Olaf Scholz për dialogun Kosovë – Serbi si dhe Emmanuel Bonne, i dërguar i presidentit francez Emmanule Macron.
Ky takimi zgjati për rreth dy orë, por detajet se çfarë u diskutuan në të ishin të pakta.
Emisari Lajcak, tha se biseduan për mënyrën se si mund ta çojnë përpara procesin dialogues.
“Mbajtëm një takim dy orësh me kryeministrin Albin Kurti, ku kemi folur rreth dialogut dhe dinamikës së re në mënyrë se si ta çojmë procesin përpara. Ishte një diskutim i thellë dhe i rëndësishëm dhe mund ta kuptoni se nuk mund të japim detaje sepse të njëjtat diskutime do të kemi sot vonë me presidentin e Serbisë, Aleksandar Vuçiq”, tha Lajçak pas takimit.
Deklarime nga kryeministri Kurti nuk kishte, por më vonë zyra e tij lëshoi një komunikatë për media përmes së cilës thuhej se Kosova në këtë takim tregoi gatishmërinë për dialogun që synon njohjen reciproke.
“U theksua se Republika e Kosovës ka treguar vullnetin dhe gatishmërinë e saj për t’u angazhuar në një dialog parimor dhe të përgatitur mirë. Kryeministri Kurti ritheksoi se qëllimi i dialogut nga i cili duhet të përfitojnë qytetarët e të dyja vendeve, duhet të jetë arritja e një marrëveshjeje ligjërisht të obligueshme me njohjen reciproke në qendër”, tha Qeveria përmes komunikatës.
Ky takim ishte paralajmëruar edhe në letrën që kancelari gjerman e presidenti francez, i kishin dërguar kryeministrit te Kosovës Albin Kurtit e presidentit te serb Aleksandër Vuciq.
Kronika e realizuar nga Valmir Gallopeni
