Emisari i Bashkimit Evropian për dialogun Kosovë – Serbi, Mirosllav Lajçak, është deklaruar pas takimit që e ka pasur me kryeministrin, Albin Kurti.
Lajçak ka thënë se ekziston një mirëkuptim për tri pikat që i ka paraqitur BE-ja për deeskalimin e situatës në veri.
“Ekziston një mirëkuptim për nevojën për të ecur përpara në tre pikat që janë paraqitur nga Bashkimi Evropian që janë: de-përshkallëzimi, zgjedhjet e parakohshme dhe kthimi në normalizim. Ne ende do të duhet të vazhdojmë diskutimin tonë për hapat konkretë që do të na çojnë atje. Ne duhet të kuptojmë më mirë qëndrimet e njëri-tjetrit dhe ramë dakord që bisedimet të vazhdojnë”, ka thënë Lajçak.
Ai ka shtuar se sanksionet janë gati edhe për Serbinë dhe do të miratohen nëse shtetet anëtare të BE-së japin dritën e gjelbër.
“Bashkimi Evropian ka bërë të qartë se ka sanksione të gatshme edhe për Serbinë dhe do të zbatohen nëse shtetet anëtare vendosin. Por ky është një vendim i shteteve anëtare. Nesër do të jem në Beograd. Dëshira ime është që të mos zbatohen sanksionet në Kosovë dhe Serbi. Dëshira ime është që të mos ketë sanksione dhe që të dyja palët të jenë në Bruksel dhe të negociojnë se si të zbatohet marrëveshja e shkurtit”, ka deklaruar ai, transmeton teve1.info.