“Nëse nuk ka Asociacion, nuk ka marrëveshje”, kështu ka thënë i dërguari i posaçëm i BE-së për dialogun ndërmjet Kosovës dhe Serbisë, Miroslav Lajçak.
Lajçak, ka thënë se Asociacioni i Komunave me Shumicë Serbe duhet të formohet dhe nëse nuk formohet sipas tij nuk do të ketë marrëveshje.
Në një intervistë në mediumin serb, ai ka thënë se qëllimi nuk është që dikush të fitojë apo të humbasë.
Sipas tij, propozimi i BE-së flet për normalizim të marrëdhënieve mes Kosovës dhe Serbisë, jo për ndonjë lloj të kapitullimit.
“Qëllimi është të kërkojmë një situatë të favorshme dhe të hapim derën evropiane”, theksoi Lajçak.
Sipas tij, takimi në Ohër synon arritjen e një marrëveshjeje për përmbushjen e marrëveshjes, e cila ka një mbështetje nga BE-ja.
Lajçak, pas vizitës në Kosovë, tashmë po qëndron në Beograd, ku është takuar me presidentin e Serbisë, Aleksandar Vuçiq.
Më 18 mars në Ohër të Maqedonisë së Veriut do të mbahet takimi mes Kurtit dhe Vuçiq, ku pritet të diskutohet për propozimin evropian, i cili është pranuar nga të dyja palët por që nuk është nënshkruar nga Serbia.
