Në moshë të shtyrë e me probleme shëndetësore, Muharrem Bullatovci, po detyrohet të marrë rrugën në këmbë.
Kjo meqë në lagjen “Velania” mungojnë linjat e autobusëve që lidhin këtë zonë me pjesët e tjera të kryeqytetit.
Sipas Bullatovcit, prej se e mban mend ai autobusë nuk ka pasur në këtë pjesë.
“Autobusë nuk kemi pasur kurrë hiç”, tha ai.
E për të bërë zgjidhje me ndonjë mjete tjetër udhëtimi ai nuk ka mundësi.
“Unë nuk mundem me shkua me pagua taksi 3 euro ku të shkosh, 3 euro me u kthye, 7 euro e kam unë ditën pension s’kam më shumë”, tregon banori.
Telashe të njëjta, sikurse Butllovci kanë edhe banorët tjerë të njërës prej lagjeve më të vjetra në kryeqytet.
“Në pjesën e poshtme ka parku shumë lartë për moshën time është zor me ec. E duhet na me u sjell rreth e rreth Prishtinës për me ardhur këtu në banesë”, thotë banori Smajl Kastrati.
Që ky problem po ju shkakton vështirësi e thotë edhe ky banor.
“Problemi është shumë më i madh se edhe ka fëmijë ka nxënës, ka punëtorë e kalimtar dhe qytetarë edhe nuk e di pse ka mbete kjo absurde e problem i pazgjidhur”, tregoi Fadil Fetahu.
Ndërsa për këtë problematik opozita në kryeqytet fajin kryesor e hedh te kryetari Përparim Rama.
“Disa herë kam bërë kërkesë të vazhdueshme për shumë lagje të Prishtinës njëra ndër ato është edhe lagjia Velania, që të ketë një linjë të rregullt të autobusëve por ekzekutivi i Prishtinës deri më tash nuk është që ka marrë ndonjë masë. Vetëm fjalë të kryetarit Rama, premtime boshe sikur këto që i ka pasur që katër vite që shumicën prej tyre nuk i ka realizuar, edhe kjo po del të jetë e parealizueshme”, tha asamblisti i VV-së, Besart Krasniqi.
Në anën tjetër për gjithë këtë çështje nga Komuna e Prishtinës thonë se do ketë zgjidhje.
“Ne si drejtori jemi në shqyrtim dhe planifikim të kërkesave dhe në planifikim të linjave të reja ku parashihen edhe lagjet e tjera që nuk kanë transport publik sidomos lagjia Velania, Arbëria dhe lagjet e tjera që nuk janë të mbuluar nga rrjeti i trafikut urban”, tha udhëheqësi i sektorit për transport dhe trafik, Halil Halili.
Ky i fundit tregoi për televizionin se në bashkëpunim me BERZH –in janë duke punuar në këtë drejtim.
