Kuvendi i Kosovës të enjten ka mbajtur seancë solemne në shënim të Betejës së Kosharës, në të cilën morën pjesën edhe krerët e shtetit.
Aty u vlerësua lufta e bërë nga pjestarët e brigadës 138 të UÇK-së.
Presidentja Vjosa Osmani, tha se operacioni i Ushtrisë Çlirimtare të Kosovës më 9 prill 1999, ishte rezistenca më paqësore gjatë përballjes me Serbinë.
“ Kjo rezistencë paqësore për gati një dekadë, ka sfiduar padrejtësinë e regjimit kriminal serb, ka bashkuar të gjithë shqiptarët rreth kauzës për liri, pavarësi e demokraci, dhe është shndërruar në frymëzim për botën duke shënuar kthesë si rezistenca paqësore me efektin më të madh në historinë moderne, sepse si rezultat pati jo vetëm bashkimin e shqiptarëve në një qëllim, por edhe ndërtimin e aleancave më të fuqishme të cilat na dolën në ndihmë për të parandaluar pikërisht shfarosjen të cilën e synonte regjimi serb”, ka thënë Osmani.
Këtë beteje të ushtarakëve nga UÇK-ja, e cilëson historike, kryekuvendari, Glauk Konjufca.
“ Kjo betejë ishte sinonimi më i mirë i betimit të ushtarit të Ushtrisë Çlirimtare të Kosovës. Shembja e gurit të kufirit me çizmen e komandantit Agim Ramadani e Salih Cekaj, ishte ishte njëra nga ngjarjet më historike të luftës sonë çlirimtare” , tha Konjufca
E kryeministri, Albin Kurti, kujtoi datën në të cilën trupat e NATO-së, bashkë me Ushtrinë Çlirimtare të Kosovës, sulmuan bazat e ushtrisë serbe të cilat ishin vendosur përgjatë kufirit të asaj kohe, Jugosllavisë dhe Shqipërisë.
“ Sot në vigjilje të pestë të fillimit të luftimeve të betejës së Koshares, le ta kujtojmë me nderime të merituara këtë betejë dhe luftëtarët dhe veteranët e saj. Pas përgatitjesh, planesh, organizimesh paraprake, në orët e hershme të mëngjesit të datës 9 prill 1999, ushtarët e UCK-së, sulmuan pozicionet dhe bazat e ushtrisë jugosllave që ndodhej midis kufirit të Jugosllavisë dhe Shqipërsië, i vendosur në vitin 1913 kundër vullnetit politik të shqiptarëve, kufiri i ndante shqiptarët padrejtësisht sepse i ndau ata dhunshëm”, tha Kurti.
Për betejën e Koshares, fjalim mbajtën edhe ish ushtarët dhe udhëheqësit e brigadës, 138, të cilët e konsideruan si ndër betejat më të përgjakshme të asaj kohe.
Ata më pas u fotografuan në hollin e Kuvendit të Kosovës.
