Kreu i Lidhjes Demokratike të Kosovës, Lumir Abdixhiku, ka njoftuar se Kuvendi i partisë do të mbahet më 31 janar, duke theksuar rëndësinë e këtij procesi për vendosjen e çështjeve më të rëndësishme të LDK-së.
“Pas diskutimit të hapur dhe të përgjegjshëm në mbledhjen e Kryesisë së LDK-së, morëm vendimin që Kuvendi i partisë të thirret më 31 janar, aty ku, sipas statutit dhe traditës sonë demokratike, vendoset për çështjet më të rëndësishme të partisë”, shkroi Abdixhiku.
Ai nënvizoi se ky Kuvend nuk është një krizë, por një mundësi.
“Ky Kuvend nuk është krizë, por mundësi. Mundësi për t’u dëgjuar, për t’u bashkuar rreth vlerave tona dhe për të dalë më të fortë nga ky proces. LDK ka kaluar shumë sfida dhe gjithmonë ka ditur të ruajë boshtin e saj: demokracinë, dinjitetin dhe besimin te anëtarësia. Edhe kësaj here do të dalim më të bashkuar dhe më të gatshëm për sfidat që na presin”, ka shkruar Abdixhiku.
Abdixhiku theksoi se politika shpesh ushqehet me tension dhe gjuhë përçarëse, ndërsa LDK zgjedh qetësinë dhe dialogun.
“Në një kohë kur politika shpesh ushqehet me tension dhe gjuhë përçarëse, ne zgjedhim maturinë. Zgjedhim qetësinë, dialogun e gjerë dhe besimin në demokracinë e brendshme. Debati është i shëndetshëm; përçarja pa debat dhe pa demokraci është dëm”, ka shkruar tutje Abdixhiku.
Ai gjithashtu u shpreh se përgjegjësia ndaj partisë dhe anëtarësisë është prioritet.
“Në LDK nuk i ikim asnjëherë përgjegjësisë. As kur është e lehtë, e sidomos kur është e vështirë. Sepse kjo shtëpi nuk është ndërtuar për rehati personale, por për shërbim dhe për përgjegjësi ndaj një ideali më të madh se secili prej nesh. Prandaj, me përgjegjësi përballemi; para anëtarësisë”, ka theksuar Abdixhiku.
Sipas Abdixhikut, pas 31 janarit, LDK do të ecë përpara “më e qartë, më e bashkuar dhe më e përgatitur për betejat që na presin”.
