Zyrtarët policorë kanë shprehur për Tëvë 1 problemet që i kanë gjatë kryerjes së detyrave zyrtare.
Njëri nga këta zyrtarë, në kushte anonimiteti tregon se tash në kohën e sezonit dimëror kanë mungesë të furnizimit me ngrohje.
“Pikë së pari vjetërsia e objektit në të cilin ndodhet stacioni policor pasi që ky objekt është i ndërtuar më shumë se 50 vite më parë. Në këtë objekt nuk punon nxemja duhet shfrytëzuar mundësi alternative me nxemje të cilat rrezikojnë zyrtarët policorë. Ndriçimi i jashtëm i stacionit mungon për shkak të prishjes dhe vjetërsisë, banjot e vjetra, sistemi elektrik ka shumë dëmtime ku shpesh duhet ndërhyrë KEDS për përmirësime”, deklaroi ai.
Po ashtu, ai tregon edhe disa probleme logjistike por edhe teknike që i hasin në përditshmëri.
“Njësitë reaguese kanë vetëm një veturë në dispozicion ku shpesh ndihen edhe ata zyrtarë të rrezikuar pasi që nuk kanë mundësi që kolegët t’iu dalin në ndihmë për t’i asistuar (edhe kjo veturë e cila është në shfrytëzim ka të kaluar më shumë se 450 km e cila nga gjendja teknike është pothuajse e pa përdorur). Problem i madh është edhe mungesa dhe prishja e fotokopjeve ku ka më shumë se një muaj thuajse fare nuk punojnë fotokopjet dhe kjo çon në vonesën e procedimit të raporteve dhe rasteve në Polici”, shtoi zyrtari policor.
Këto kushte të vështira pune po i kundërshtojnë edhe nga Sindikata e Policisë, ku vlerësojnë se kjo ndikon edhe në kryerjen e detyrave.
Kryesindikalisti thotë se kushte edhe më të vështira ka në stacionet tjera policore në gjithë vendin, teksa tregon njëri nga rastet që siç thotë ai është më i rëndi.
Tëvë1 ka kërkuar përgjigje për këto probleme edhe nga menaxhmenti i Policisë, por që deri në publikimin e kronikës nuk kanë kthyer përgjigje.
Pikërisht për kushtet e punës, disa njësi të Policisë javën e kaluar mbajtën një protestë para objektit të Qeverisë ku kërkuan një mirëqenie më të mirë nga institucionet.
