Egzon Osmanaj nga Fondacioni Friedrich Ebert Stiftung për zgjidhjen e “ngërçit” të Kuvendit të Kosovës thotë se nuk ka zgjidhje ligjore as kushtetuese.
Kjo pasi, sipas tij, kriza është puro politike dhe e vetmja zgjedhje është përmes politikës.
“Kriza është puro politike dhe duhet pasur zgjidhje politike. Nuk ka në këtë moment zgjidhje ligjore as kushtetuese. Aq më pak që përfshihen juristët në këtë diskutim është më mirë, për shkak që krejt këto probleme i kemi për arsye që në fillim nuk janë parë sa duhet këto probleme. Ne po shkaktojmë vazhdimisht probleme. E pamë se si u shkaktua problemi i parë në votimin e raportit për verifikimin e mandatëve, i cili një interpretim tejet i ngushtë dhe teknik i ligjit dhe që krijoi shumë probleme. Me interpretime të tilla të ngushta po kemi vazhdimisht probleme”, tha ai në emisionin “Info Nata” në Tëvë1.
Nëse mungon vullneti politik për zgjidhjen e problemit, atëherë Osmanaj lë fajtorë të gjithë akterët politikë.
“Nëse ka vullnet politik është shumë lehtë të kalohet. Nëse nuk ka vullnet politik, nuk ka ndonjë opsion tjetër. Për shkak, nuk është bllokadë juridike, por është puro bllokadë politike dhe vetëm me marrëveshje mund të tejkalohet. Fajtorë për këtë situatë janë të gjithë akterët politikë. Barrën e përgjegjësisë në këtë moment normalisht e mban partia më e madhe për shkak që e ka përgjegjësinë për konstituimin dhe themelim të institucioneve, jo rastësisht e takon e drejta edhe për propozimin e kryetarit të Kuvendit”
Ai thotë se nëse palët vazhdojnë të mbajnë qëndrimet e deritashme politike, konstituimi i Kuvendit nuk do të bëhet edhe pas zgjedhje lokale.
Edhe sot për herë të gjashtë radhazi ka dështuar seanca konstituive e Kuvendit. Ndërkohë, përfaqësuesit e partive politike shkëmbyen akuza për njëri-tjetrit për bllokadë. Albulena Haxhiu për katër herë radhazi dështoi të zgjedhet kryeparlamentare, pro nga VV-ja thonë se nuk do të heqin dorë nga ky propozim./teve1.info/
