Gjatë këtij muaji, emisari i Bashkimit Evropian për dialogun Kosovë-Serbi, Miroslav Lajcak bëri dy udhëtime për në Prishtinë e Beograd. Mirëpo edhe pas një dakordimi për takim trepalësh në këto takime, i njëjti nuk u zhvillua në Bruksel. Kosova dhe Serbia e kanë drejtuar gishtin nga njëri tjetrin si refuzues, derisa nga BE-ja nuk kanë dhënë detaje. Për njohësit e politikës, dialogu është në qorrsokak dhe Lajçak ka humbur autoritetin e tij si ndërmjetësues.
Edhe një tentim i radhës i Bashkimit Evropian për t’i ulur ballë për ballë dështoi.
Pas dy udhëtimeve në Prishtinë e Beograd, emisari i BE-së për dialog, Miroslav Lajçak tha se palët janë dakorduar për një takim trepalësh.
Mirëpo, as të martën, kryenegociatori i Kosovës, Besnik Bislimi dhe ai i Serbisë, Petar Petkoviq nuk u panë sy më sy.
Sipas njohësit të politikës, Melazim Koci këto lojëra të Serbisë për mostakime janë vetëm tentime për të blerë kohë.
Për Visar Xanin, rruga për dialog ka dështuar pasi emisari Lajçak e ka humbur autoritetin e tij si ndërmjetësues.
Nga 14 shtatori i vitit 2023, kryeministri i Kosovës, Albin Kurti dhe presidenti i Serbisë, Aleksandar Vuçiq nuk janë takuar.
Gjatë kësaj periudhe, në Bruksel ka pasur vetëm takime të kryenegociatorëve, Bislimit dhe Petkoviqit dhe të gjitha kanë qenë pa ndonjë rezultat.
