Demo Berisha është shqiptari i cili është propozuar për ministër në qeverinë e Serbisë, nga Presidenti serb, Aleksandar Vuçiq.
Me një veprim të paprecedentë, Vuçiq e propozoi Berishën e lindur në Pejë, për të drejtuar ministrinë për të Drejtat e Njeriut dhe Pakicave.
Vendimi nuk është mirëpritur aspak mirë nga përfaqësuesit e shqiptarëve në Parlamentin e Serbisë.
Deputeti Shaip Kamberi e konsideron propozimin të turpshëm.
“Propozimi i Demo Berišës për postin e Ministrit për të Drejtat e Njeriut dhe të Pakicave është një goditje e rëndë për çdo shqiptar që ka vuajtur, rezistuar dhe sakrifikuar për të drejtat e veta në Serbi. Ky emërim është jo vetëm politikisht i papranueshëm, por edhe moralisht i turpshëm. Sepse Demo Beriša nuk është një përfaqësues i të drejtave të njeriut, por një simbol i mohimit të identitetit kombëtar dhe politik të shqiptarëve të Kosovës dhe të Luginës së Preshevës. Siç dëshmojnë pamjet, deklaratat dhe intervistat publike, Demo Beriša është një ish-oficer i ushtrisë serbe, pjesë e strukturave që kanë qenë të përfshira në krime të luftës në Kosovë”, ka shkruar Kambderi.
Në një reagim në rrjetet sociale, Kamberi ka treguar se Demo Berisha në intervista publike ka mohuar NATO-n, si dhe ka përkrahur narrativën serbe për lufën, duke u paraqitur si përfaqësues i shqiptarëve në Serbi.
Por, kush është Demo Berisha?
Përkundër se i lindur në Pejë, në shumë raste Berisha ka deklaruar se Serbinë e sheh si atdheun e tij, duke e llogaritur Kosovën si pjesë të saj.
Ai e ka konfirmuar se ka qenë pjesë e ushtrisë jugollsave, si dhe ka shërbyer më pas në policinë ushtarake të Serbisë.
Siç e ka përmendur edhe Shaip Kamberi, Berisha besohet se ka shërbyer në policinë serbe edhe në vitet e 90-ta, madje ka marrrë pjesë edhe në luftën në Kosovë.
