Me 31 janar përfundon mandati i të dërguarit të posaçëm të BE-së për dialogun Kosovë – Serbi, Miroslav Lajcak. Njohësit e çështjeve politike thonë se ndërmjetësi i ri duhet të vijë nga një shtet me ndikim më të madh e jo nga vendet mosnjohese. E pas tërheqjes se ish-presidentit slloven, Borut Pahor, dy kandidatet e vetëm për këtë post janë diplomati danez, Peter Sorensen dhe ish-ministri i jashtëm i Finlandës, Pekka Haavisto.
Në prillin e vitit 2020, u emërua përfaqësues special i Bashkimit Evropian për dialogun mes Prishtinës dhe Beogradit.
Për 4 vjet, Miroslav Lajçak u mundua ta gjej gjuhën e pajtimit, mes palës kosovare dhe asaj serbe.
E me 31 janar, diplomatit sllovak do t’i përfundojë mandati.
Me punën e tij, disa herë u shprehën të pakënaqur pala kosovare.
E besim në suksesin e Lajçak, thonë se nuk patën as njohësit e çështjeve politike në Kosovë.
“Angazhimi i tij ka qenë fiasko, personalisht nuk e kam pritur të ketë sukses, nga praktika që ka treguar në të gjitha angazhimet e tija ndërkombëtare, mirëpo ky mossukses nuk ka qenë krejtësisht pasojë e faktit që dyshja kryesore, Borell dhe Lajcak, nga vendet mosnjohese të Kosovës, fajin kryesor e ka pasur BE-ja, pasi nuk ka pasur një vizion të konkretizuar se si t’i qaset përshpejtimit të procesit të dialogut”, ka thënë analisti politik, Albinot Maloku.
Ndërsa të vetmit kandidatë për këtë post, po shihen diplomati danez, Peter Sorensen dhe të ish-ministri i jashtëm të Finlandës, Pekka Haavisto.
“Probabiliteti është të vije dikush nga shtet më vendosese, edhe në rrafshin e fuqisë së tyre, por edhe të neutraliteti në raportin mes Kosovës dhe Serbisë, mos të shihet nga palët as si mik as si armik”.
E detaje se kush do ta pasojë Lajçakun, nuk kanë dhënë të martën as nga Bashkimi Evropian.
“Mandate i përfaqësuesit të lartë Miroslav Lajçak mbetet në fuqi deri në fund të janarit. Zgjedhja e pasardhësit të tij është momentalisht në vazhdim e sipër dhe në do të japim njoftime të reja me kohë”, ka thënë zëdhënësja e BE-së, Anitta Hipper.
Për këtë post, së fundmi u tërhoq ish-presidenti slloven, Borut Pahor.
