Shefja e Grupit Paralamnetar të Vetëvendosjes, Mimoza Kusari –Lila, ka thënë se për rastin e Klan Kosovës, të cilës i është pezulluar licenca është më rëndësi të zbardhen të gjitha faktet.
Ajo ka thënë se duhet sqaruar se pse shtetas të Republikës së Kosovës, regjistrohen si shtetas të Serbisë dhe regjistrojnë biznes atje e më pas vazhdojnë në Maqedoninë e Veriut dhe blejnë medium në Kosovë.
“Në situatën aktuale është e rëndësishme zbardhja e të gjitha fakteve. Është më rëndësi të dihet se pse shtetas të Republikës së Kosovës me shtetësi të Republikës së Kosovës.. nisen për në Serbi, marrin shtetësi të Serbisë, regjistrojnë biznes atje për të vazhduar në Maqedoninë Veriore dhe pastaj për të ardhur në Kosovë , për tu angazhuar në blerjen e një mediumi. Dhe këto besoj për një gazetari të mirëfilltë është dashur të thuhet edhe nga pronari i Klan Kosovës të cilat nuk po i dëgjojmë”, ka thënë ajo të hënën në një konferencë për media, përcjell teve1.info.
Kusari-Lila e pyetur për protestën e sotme të thirrur nga Asociacioni Gazetarëve të Kosovës, kundër pezullimit të certifikatës së biznesit të Klan Kosovës, ka thënë se gazetarët i përfaqëson AGK-ja, por ka thënë se në dy Komisionet e Kuvendit ku është diskutuar për këtë çështje, atë për Media dhe Financa, ka pasur prezencë të paktën mediatike.
“Ka pasur shumë pak prezencë mediatike , ju inkurajojë të merrni transkriptet dhe të lexoni mbi proceset të cilat e karakterizojnë vendimmarrjen e Komisionit të Pavarur për Media përfshirë edhe rastin e Klan Kosovës, ku janë evidentuar shkelje të rënda”, ka thënë ajo.
