Deputetja e Lëvizjes Vetëvendosje, Mimoza Kusari-Lila, ka mohuar akuzat për shkelje të rregullores së Kuvendit në lidhje me propozimin që seancat konstituive të mbahen një herë në javë, e jo çdo 48 orë siç parashihet.
Sipas saj, bëhet fjalë për një propozim të hapur për konsultim ndërmjet grupeve parlamentare dhe jo për ndonjë veprim të njëanshëm apo në kundërshtim me rregulloren.
Ajo shtoi se ky ka qenë një propozim për dakordim, i cili nuk është pranuar dhe rrjedhimisht nuk është realizuar.
“Siç e patë, seanca është filluar me një kërkesë për konsultim. Që në një dakordim të plotë nëse ka mes grupeve parlamentare në një shmangie të rregullores ose të procedurës që të takohemi më rrallë. Pasi 48 orëshi brenda këtij muaji në vazhdimësi po përsëritet, po shihet që nuk e ka atë rezultat, përderisa partitë e opozitës nuk e kanë as një reflektim me përgjegjësinë e tyre për zhbllokimin e Kuvendit. Ai ishte një propozim me dakordim i cili nuk u mbështet dhe nuk u realizua. Nuk ka asgjë që mund të quhet apo të deklarohet si shkelje. Por për të kthyer në një orar tjetër këto takime”, tha ajo.
