Deputetja e Lëvizjes Vetëvendosje, Mimoza Kusari-Lila, ka thënë se Albulena Haxhiu i përmbush kushtet për të qenë kryetare e Kuvendit të Kosovës, duke i hedhur poshtë kundërshtimet e partive të tjera parlamentare.
Ajo tha se lehtësia me të cilën po kërkohet dhe vlerësohet mundësia e ndërrimit të kandidates së Lëvizjes Vetëvendosje “është tërësisht e papranueshme”.
“Për të gjithë ata që e kritikojnë Albulena Haxhiun, ju them se ajo është gruaja më e votuar në zgjedhjet e 9 shkurtit me 125 mijë vota. Pesha politike dhe legjitimiteti i zonjës Haxhiu për të qenë kryetare e Kuvendit është e pakontestueshme”, tha ajo.
