Kryeministri në detyrë dhe lideri i Lëvizjes Vetëvendosje, Albin Kurti, ka bërë të ditur se gjatë një takimi me strukturat e partisë në Vushtrri është zyrtarizuar kandidati për zgjedhjet lokale të vjeshtës.
Përmes një postimi në rrjetin social Facebook, Kurti ka njoftuar se Dr. Sylejman Meholli do të jetë kandidati i Vetëvendosjes për kryetar të Komunës së Vushtrrisë në zgjedhjet që pritet të mbahen në muajin tetor.
“Dr. Sylejman Meholli e përfaqëson Vushtrrinë në VETËVENDOSJE! dhe VETËVENDOSJE!-n në Vushtrri. Me mbështetjen e qytetarëve dhe me besimin tonë në fitore, ai është kandidati ynë për kryetar të komunës në zgjedhjet e tetorit”, ka shkruar Kurti.
Lëvizja Vetëvendosje pritet që ditëve në vijim të vazhdojë me prezantimin e kandidatëve për komunat tjera të vendit, teksa vendi po hyn në fazën përgatitore për zgjedhjet lokale të këtij viti.
