Kryeministri në detyrë i Kosovës, Albin Kurti ka thënë se vrasja e rreshterit të Policisë së Kosovës, Muhamed Lika do të ndriçohet dhe se përgjegjësit do të dënohen.
Ai pas vizitës për ngushëllime që ka bërë në familjen e tij, ka thënë se vlerësuar kontributin e rreshterit Lika.
“Rreshteri Muhamed Lika ka punuar e kontribuar shumë për rendin e ligjin, paqen e sigurinë e qytetarëve dhe shtetit tonë. E para kësaj, është angazhuar e ka kontribuar si luftëtar i UÇK-së për çlirimin e popullit dhe vendit tonë. Vrasja e tij do të ndriçohet e kriminelët tinëzarë do të gjykohen e dënohen. Emri i tij do të rrojë e kujtimi për të nuk do të shlyhet”, ka shkruar Kurti në librin e ngushëllimeve.
Rreshteri Lika u vra në hyrje të banesës së tij në Kaçanit më 1 prill.
Kurti për ngushëllime ishte i shoqëruar nga ministri në detyrë i Punëve të Brendshme, Xhelal Sveçla dhe zëvendësministri në detyrë i Mjedisit, Planifikimit Hapësinor dhe Infrastrukturës, Jeton Raka.
