Kryeministri i vendit, Albin Kurti, ka shkuar sot për vizitë ngushëlluese te familja e Lulzim Fejzullahut, i cili rrah për vdekje para disa ditësh në Podujevë.
Gjatë vizitës atje, Kurti ka thënë se vrasja e 18-vjeçarit, duhet të jetë alarm për të gjithë, e posaçërisht për institucionet e vendit, që të orientohen sa më shumë drejt arsimimit dhe edukimit, që dhuna të mos jetë zgjidhje.
Njëherit, kryeministri u ka bërë thirrje organeve të sigurisë dhe drejtësisë që ta trajtojnë këtë rast me përgjegjësinë më të lartë.
“Vrasja mizore e Lulzim Fejzullahut duhet të jetë alarm për të gjithë, përfshirë institucionet, për të punuar më shumë me të rinjtë dhe të rejat, që të orientohen sa më shumë drejtë arsimimit dhe edukimit, në mënyrë që të mos e shohin dhunën si zgjidhje dhe që të qëndrojnë sa më larg sjelljeve agresive dhe akteve të dhunës që mund të përfundojnë me pasoja tragjike. Kryeministri Kurti bëri thirrje që organet e sigurisë dhe drejtësisë ta trajtojnë këtë rast me përgjegjësinë më të lartë dhe bëri thirrje për drejtësi. Pasi shprehu ngushëllimet në emër të tij dhe të Qeverisë së Republikës së Kosovës, kryeministri tha se humbja e jetës së një të riu në mënyrë tragjike na ka tronditur të gjithëve dhe është dhembje e madhe jo vetëm për familjen e tij por edhe për mbarë vendin”, ka deklaruar Kurti.
Më tej, Kurti ka potencuar se një rast i tillë duhet të jetë moment reflektimi për të gjithë.
“Të rinjtë te moshatarët e tyre duhet gjithmonë të shohim potencialin e shoqërisë dhe shoqërimit, asnjëherë të kërcënimit dhe sulmit. I ndjeri, Lulzim Fejzullahu ishte fëmijë jetim që ka pasur nevojë për mbështetje e kujdes nga të gjithë për një jetë të përmbushur. Sot, rasti i tij tragjik duhet të jetë moment reflektimi për të gjithë”, ka shtuar tutje kryeministri.
18-vjeçari Lulzim Fejzullahu, nga Podujeva, më 14 janar u godit me veturë nga dy persona të cilët më pas e rrahën për vdekje me shufra metalike.
Mirëpo, si pasojë e plagëve të marra, 18-vjeçari ndërroi jetë pas dita ditësh në QKUK.
