Kryeministrit në detyrë i Kosovës, Albin Kurti të hënën ka vizituar dy banesat sociale në Shipol dhe Desi, në Mitrovicë.
Në komunikatë thuhet se Kurti pa nga afër intervenimet për kthimin e banesave sociale nga ndërtesa të amortizuara në shtëpi të denja për jetesë të sigurt, të ngrohtë dhe të dinjitetshme.
“Nuk mjafton vetëm të hyjmë në ndërtesa për banim social e aty të ketë mungesë të sigurisë e të ngrohjes. Tash po realizohet kjo në kuadër të investimit të përbashkët me Bashkimin Evropian. Është diku rreth 6 milionë euro në 25 ndërtesa anembanë Kosovës”, është shprehur Kurti.
Sipas komunikatës dy ndërtesat në Shipol dhe Desi që janë të viteve 2003 dhe 2005 kanë mbetur pa izolim të duhur, dritare efikase dhe ngrohje adekuate, ndërsa tani falë investimit prej 381mijë e 622 euro për këto dy objekte thuhet se do të përfundojnë para vjeshtës dhe do të ndryshojnë jetën e 39 familjeve dhe 173 banorëve të Mitrovicës.
“Në Shipol përfituese do të jenë 18 familje me sipërfaqe totale të ndërtesës që është pjesë e projektit të përgjithshëm prej 1,130 metrash katrorë, ndërsa në Desi përfituese do të jenë 21 familje me sipërfaqe totale të ndërtesës që është pjesë e projektit të përgjithshëm prej rreth 1,700 metrash katrorë”, thuhet në komunikatë.
Më tej bëhet e ditur se këto rinovime po bëhen nga Fondi i Kosovёs pёr Efiçiencё tё Energjisё me mbështetje nga Qeveria e Kosovës, përmes grantit nga Bashkimi Evropian me 90% dhe pjesëmarrje të Komunës së Mitrovicës së Jugut me 10%.
“Qeveria vijon angazhimin për të përmirësuar kushtet e jetesës për qindra e mijëra qytetarë dhe ulur kostot e shpenzimeve të energjisë, gjersa deri më tani kemi mbështetur 3,000 familje me izolim të shtëpive e mbi 40,000 familje me pajisje efiçiente dhe panele solare, duke renovuar dhe 125 ndërtesa publike, kryesisht shkolla dhe spitale”, theksohet në komunikatë./teve1.info/
