Kurti është shprehur i kënaqur për vizitën e parë të Scholz në Kosovë, teksa ka thënë se kanë zhvilluar edhe takim tete-a-tete.
“Pata kënaqësinë e veçantë që në vizitën e parë të një kancelari gjerman në Qeverinë e Republikës së Kosovës, ta mirëpres Kancelarin Scholz në Aeroportin “Adem Jashari”, të parakalojmë bashkë në ceremoninë pritëse me nderime të larta shtetërore, të bisedojmë në një takim tête-à-tête, të diskutojmë me delegacionet tona shtetërore, dhe t’i drejtohemi popullit të Republikës nëpërmjet një konference të përbashkët për media”, ka shkruar Kurti në një postim në Facebook.
Sipas tij, vizita e sotme e kancelarit gjerman ishte dëshmi e marrëdhënieve të forta të dyja vendeve.
“Vizita e sotme e kancelarit gjerman ishte historike. Përveçse e para e tillë që nga shpallja e pavarësisë, ishte dëshmi e marrëdhënieve tona të forta si dy vende partnere dhe aleate për njëra-tjetrën, të lidhura me vlera të përbashkëta të lirisë dhe demokracisë, në një moment përcaktues për rajonin dhe kontinentin tonë”, tha më tej kryeministri Albin Kurti. /teve1.info/
