Ndalesën e parë e pati tek Ura e Ibrit.
Aty kryeministri Albin Kurti u prit nga qytetarë të shumtë.
Madje kishte të atillë që në gjoks mbanin veshje me figurën e tij.
Pas përshëndetjeve, vizitën e vazhdoi në drejtim të sheshit në Mitrovicë të Veriut.
Pas përfundimit të takimit me qytetarë, Kurti për Tëvë1 foli për situatën në katër komunat veriore.
Sipas tij, të gjitha veprimet e ndërmarra në veri janë bërë në koordinimin me SHBA-në dhe BE-në.
“Ne angazhohemi për të gjithë qytetarët. Pra kjo nuk është për inate të askujt kjo është për të mirën e qytetarëve të Republikës pa dallim prejardhje, etnie, moshe, gjinie e feje dhe unë jam i bindur që eliminimi i strukturave ilegale e paralele të Serbisë është në dobi edhe të vet serbëve të cilët janë çliruar prej prej zullumqarëve e mujsharëve që i terrorizonin qytetarët qoftë me kërcënime e shantazhe, qoftë edhe me sulme fizike e që ne dimë se janë rreth 20 vetura të djegura të serbëve në veri nga strukturat e Serbisë për arsyeje se ato po bashkëpunonin me shtetin e Kosovës që është i orientuar nga Bashkimi Evropian, nga Shtetet e Bashkuara të Amerikës nga NATO-ja”, tha ai.
Shefi i Ekzekutivit u ndal edhe në një biznes të shqiptarëve, nga ku tha se të njëjtit kanë bashkëpunim me të gjithë qytetarët pa dallim.
“Erdhëm këtu në veri të Mitrovicës ku duket qartë se qytetarët qarkullojnë lirshëm bashkëpunojnë me njëri-tjetrin, ekonomia, tregu i lidhë ata i afron ata, edhe unë dua sa më shumë bashkëpunim rritje ekonomike e mirëqenie sociale”, potencoi Kurti.
Përveç vizitës në veri të Mitrovicës, Kurti vizitoi edhe përurimin e stacionit të policisë në Leshak të Leposaviqit.
“Është për t’i ofruar shërbime dhe siguri qytetarëve, ka kushtuar më pak se 782 mijë euro është ndërtuar me më pak se sa pesë muaj, herën e fundit kur isha atje ishte me rastin e vendosjes së gurthemelit në datën 10 shtator të vitit të kaluar, pastaj isha edhe në Ujman”, shtoi ai.
Vizitën e përfundoi në liqenin e Ujmanit, teksa tha se do ta vazhdojnë shtrirjen e sovranitetit në veri.
