Në kuadër të ushtrimit fushor ”Ujku i Çeliktë”, Forca e Sigurisë së Kosovës ka organizuar Ditën e Vizitorëve me ç’rast u demonstruan edhe disa operacione ushtarake.
Kryeministri i Kosovës, Albin Kurti ka marrë pjesë në këtë organizim ku ka thënë se ky ushtrim përfaqëson më shumë se një testim të kapaciteteve tona mbrojtëse.
“Ky ushtrim përfaqëson më shumë se një testim të kapaciteteve tona mbrojtëse sikurse u dëshmua edhe sot dhe paraqet tregues të qartë të përkushtimit dhe profesionalizimit të ushtrisë sonë. E veçanta e këtij ushtrimi është se pikërisht bëhet validimi i regjimentit të dytë të FSK-së duke konfirmuar zhvillimin dhe forcimin e vazhdueshëm të ushtrisë sonë drejtë standardeve më të larta ndërkombëtare. Validimi i këtij regjimenti është tregues i qëndrueshmërisë dhe përcaktimit tonë për t’i forcuar kapacitetet tona mbrojtëse të cilat patjetër që garantojnë sigurinë dhe paqen në vendin tonë”, tha ai.
Më tej, Kurti para ushtarëve të FSK-së tha se në ushtrimin e sotëm u tregua se Kosova po bëhet gati me zell të madh për “Defender Europe 2025”.
Madje, ai shtoi se ky ushtrim i FSK-së është mburojë e Kosovës.
“Një element tjetër i rëndësishëm i këtij ushtrimi është përdorimi i pajisjeve dhe armatimit modern të cilët janë blerë dhe integruar në flotën tonë në këto vitet e fundit. Këto pajisje dhe ky armatim i blerë sipas standardeve të NATO janë produkt i një strategjie të detajuar të investimeve tona në fushën e mbrojtjes….Ky ushtrim na tregoi se FSK është mburojë e vendit tonë, por edhe një partner i besueshëm për paqen dhe sigurinë rajonale për aleatët e Kosovës….Jeni garanci e pathyeshme se e ardhmja e Kosovës është në duar të sigurta. Për ushtrim e në ushtrimin më të madh të NATO-së “Defender Europe 2025” kësaj radhe jo vetëm si pjesëmarrës, por edhe si nikoqir dëshmuam se po bëhemi gati me zell të madh e disiplinë të madhe. Ushtrimi ‘Ujku i Çeliktë’ nuk është thjeshtë një ushtrim i radhës, është një ushtrim që tregon shpirtin tuaj ushtarak”, u shpreh Kurti./teve1.info/
