Kryeministri në detyrë i Kosovës, Albin Kurti, u ka bërë thirrje mërgimtarëve që të regjistrohen për të votuar në zgjedhjet lokale të 12 tetorit, duke theksuar rëndësinë e angazhimit të tyre në procesin demokratik.
Në një mesazh drejtuar diasporës, Kurti tha se falë angazhimit të tyre në zgjedhjet qendrore, subjekti i tij ka dalë i pari në 22 komuna të vendit.
“Tani, me zgjedhjet lokale që po afrojnë, le t’i bëjmë komunat anembanë Kosovës shembull të qytetarisë, të zhvillimit dhe të qeverisjes sonë të mirë”, deklaroi Kurti.
Ai kujtoi se afati për regjistrim skadon më 29 gusht, pra pas vetëm gjashtë ditësh, duke theksuar se procesi është i lehtë dhe i shpejtë.
“Mos e lini për nesër, regjistrohuni tani. Me votën tuaj, komunat do të kenë njerëz të ndershëm e të përkushtuar që punojnë për qytetarët, duke larguar nga pushteti klanet dhe ata që i shohin komunat si pronë private”, shtoi ai.
Kurti përfundoi thirrjen e tij me mesazhin se “me votën e diasporës, fitoret tona bëhen të plota”.
