Kryeministri i vendit, Albin Kurti ka përkujtuar sot martirët e Paklekut të ri të Drenasit dhe Studimes së Vushtrrisë.
Kurti tha se 25 vjet më parë forcat serbe, vranë dhe zhdukën me forcë dhjetë civilë shqiptarë në Paklek të ri, teksa për fatin dhe vendodhjen e nëntë prej tyre nuk dihet ende.
Tutje ai theksoi se një vit më pas më 31 maj 1999, në Studime, forcat serbe masakruan 13 anëtarë të familjes Gërxhaliu, ku në mesin e tyre, shtatë ishin fëmijë.
“Këto masakra, vrasje e zhdukje me forcë, sikurse edhe të gjitha masakrat tjera në Kosovë, janë dëshmi e pamohueshme e krimeve të luftës, krimeve kundër njerëzimit dhe gjenocidit të shtetit të Serbisë ndaj shqiptarëve gjatë luftës 1998-1999 në Kosovë.Trupi i Kosovës i gjithi është i mbushur me plagë, të cilat për t´u shëruar kanë nevojë për drejtësi. Drejtësia është i vetmi ilaç. Është themeli i qëndrueshëm për paqe.U prehshin në paqe martirët dhe dëshmorët e Paklekut të Ri dhe Studimes”, shkroi Kurti në Facebook./teve1.info./
