Kryeministri i vendit, Albin Kurti ka zhvilluar mbrëmjen e sotme një bisedë telefonike me sekretarin për Punë të Jashtme të Mbretërisë së Bashkuar, James Cleverly.
Sipas njoftimit të Zyrës së Kryeministrit, biseda ishte e përqendruar rreth zhvillimeve të fundit, me theks te situata në katër komunat në veri të vendit, përcjell teve1.info
Kurti me këtë rast ka thënë se situata këto ditë është përgjithësisht e qetë “sepse nuk ka sulme të urdhëruara dhe të orkestruara nga Beogradi ndaj forcave të rendit dhe sigurisë”.
“Për sa i takon rrugës përpara drejt deeskalimit të plotë ai tha se sundimi i ligjit duhet të jetë hapi dhe parimi bazë. Vetëm sundimi i ligjit mund t’i hap rrugë zgjedhjeve të parakohshme, të lira e demokratike, dhe një fushate parazgjedhore të hapur dhe fer, theksoi kryeministri”, bëhet e ditur në njoftim.
Temë diskutimi gjatë kësaj bisede ishte edhe procesi i dialogut të ndërmjetësuar nga Bashkimi Evropian, si dhe për marrëveshjet e arritura së fundmi në Bruksel dhe Ohër.
“Gjithashtu e njoftoi sekretarin Cleverly dhe për propozimin e Qeverisë e Kosovës, të inspiruar nga modeli kroat, në kuadër zbatimit të nenit 7 të Marrëveshje Bazike, dhe për nevojën për angazhim më të madh në sekuencimin e duhur të zbatimit të plotë të Marrëveshjes, dhe për gatishmërinë e tij për takime të radhës drejt këtij qëllimi. Kryeministri vlerësoi rolin dhe kontributin e Lord Stuart Peach teksa shprehu falënderimin për mbështetjen dhe interesimin e vazhdueshëm të Mbretërisë së Bashkuar”, thuhet tutje në njoftim. /Teve1.info/
