Kryeministri i Kosovës, Albin Kurti, gjatë seancës së sotme në Kuvendin e Kosovës është duke raportuar për Marrëveshjen e dakorduar, me presidentin e Serbisë, Aleksandar Vuçiq, më 18 mars në Ohër të Maqedonisë së Veriut.
Për çështjen e Asociacionit, Kurti ka thënë se nuk duhet të lejojnë të shkelen parimet evropiane, dhe sipas tij, Kosova tashmë e ka një mekanizëm jo territorial të ndarjes së pushtetit.
“Kosova tashmë e ka një mekanizëm jo territorial të ndarjes së pushtetit dhe ne mundemi vetëm të ndërtojmë mbi të. Gjithashtu, nuk mund të lejojmë që të shkelen parimet evropiane dhe të drejtat e njeriut. Është e rëndësishme të theksojmë që çfarëdo mundësie diskriminuese duhet ta parandalojmë. Konkretisht, duhet të shmangim çfarëdo problemesh që mund t’i ngjajë atyre që janë shfaqur në Bosnjë”, tha Kurti gjatë raportimit në Kuvend.
Kurti ka thënë se kurrë nuk do të konsiderojë asnjë model të autonomisë territoriale, raporton teve1.info.
“Unë kurrë e përsërisë kurrë, që do të thotë asnjëherë, askund, nuk do ta konsideroj asnjë model të autonomisë territoriale. Megjithëse ato marrëveshjet e mëhershme të Brukselit janë mbështetur shumë në territorialitetin si element qenësor. Komunat nuk janë vetëm njësi administrative, por edhe territoriale, prandaj territoraliteti ka qenë thelbi i gabuar të cilën nuk guxojmë as ta lejojmë, as ta përsërisim”, tha kryeministri.
Kurti për Marrëveshjen e arritur në Ohër ka thënë se është një dokument i ri, i pa arritshëm më parë.
“Kemi një dokument të ri në dorë, dhe duhet ta shfrytëzojmë sa më mirë. E kemi një dokument të ri, çfarë ka qenë i pa parë dhe i pa arritshëm më herët dhe kjo është edhe armë e fuqishme për neve për të ecur përpara. Me dokumentet e mëhershme kemi ngecur, me këtë dokument mund të ecim”.
Kurti, për këtë çështje ka thënë se kërkohet të fillojnë me proces të gjerë konsultimesh brenda dhe jashtë Kosovës.
“Siç kërkohet nga obligimet tona do të fillojmë një proces të gjerë konsultimesh edhe brenda Kosovës edhe me partnerët tanë, edhe me komunitetin jo shumicë serbë, edhe të pakicave tjera të cilët janë këtu në Kosovë, në mënyrë që të vazhdojmë të diskutojmë në mënyrë gjithëpërfshirëse për këtë çështje”, tha ai. /teve1.info/
