Të hënën më 21 gusht, kryeministri i vendit, Albin Kurti do të marr pjesë në një darkë joformale diskutimi mbi zgjerimin dhe të ardhmen evropiane të Ballkanit Perëndimor që do të organizohet nga kryeministri grek, Kyriakos Mitsotakis.
Agjencia greke e lajmeve ANA – MPA raporton sipas burimeve se ky takim do mbahet nga ora 20:15.
Presidentja e Komisionit Evropian, Ursula von der Leyen dhe presidenti i Këshillit Evropian, Charles Michel i janë përgjigjur pozitivisht ftesës së Mitsotakis.
Teksa përpos Kurtit, nga liderët rajonalë do të marr pjesë edhe kryeministri i Maqedonisë së Veriut Dimitar Kovaçevski, presidenti malazez, Jakov Milatoviç, presidenti serb, Aleksandar Vuçiq, si dhe kryetarja e Këshillit të Ministrave të Bosnjës dhe Hercegovinës, Borjana Kristo.
Në darkën joformale do të marrin pjesë edhe liderët e vendeve që janë anëtare të BE-së si kryeministri i Bullgarisë, Nikolai Denkov, i Kroacisë, Andrej Plenkoviq, dhe i Rumanisë Ion-Marsel Ciolacu.
Shqipëria e ftuar në nivel presidenti nuk do të përfaqësohet si dhe lideri i Sllovenisë i cili ka bërë të ditur se nuk do të marrë pjesë në takim. /Teve1.info/
