Kryeministri i vendit, Albin Kurti, ka takuar presidentin e Fondacionit “Zoja e Këshillit të mirë”, At Ruggero Valentini, i cili e viziton Kosovën për herë të parë.
Sipas njoftimit të ZKM-së, gjatë takimit u prezantua veprimtaria e gjatë e këtij fondacioni në Tiranë, të cilët kanë themeluar Universitetin dhe Spitalin me të njëjtin emër.
“U diskutua për mundësitë e bashkëpunimit në fushën e edukimit dhe arsimimit, shëndetësisë dhe kulturës. Në mes tjerash u theksua rëndësia e bashkëpunimit në ndërlidhjen e arsimit me sektorin e ekonomisë, me qëllim krijimin e kuadrove profesionale të përgatitura për kërkesat e tregut”, thuhet në njoftim.
Gjatë vizitës së tij, At Ruggero Valentini ka zhvilluar takime edhe me ministrin e Shëndetësisë, Arben Vitia, ministrin e Kulturës, Rinisë dhe Sportit, Hajrulla Çeku dhe ministren e Arsimit, Shkencës, Teknologjisë dhe Inovacionit, Arbërie Nagavci.
