Kryeministri i vendit, Albin Kurti, këto dy ditët e fundit ka pritur në gjashtë nga shtatë kandidatët shqiptarë për deputetë në zgjedhjet e 17 dhjetorit në Serbi.
Pjesë e takimit ishin Shaip Kamberi, Nagip Arifi, Ragmi Mustafa, Shqiprim Jonuzi, Naser Aziri e Armend Aliu, përcjell teve1.info
Bëhet e ditur se gjatë takimit u diskutua situata në Preshevë, Medvegjë e Bujanoc.
“U diskutua gjendja e shqiptarëve në Preshevë, Medvegjë e Bujanoc, diskriminimi që u bëhet atyre dhe asimetria me Kosovën, ku siç dihet, në Kosovë deputetët e Listës Serbe i bojkotojnë dhjetë ulëset e rezervuara, ndërkaq në Luginë, shqiptarëve iu pasivizohen adresat dhe diskutohet nëse do të mund t’i arrijnë tre deputetë. Ishte konstatim i përbashkët, që një listë e përbashkët ndihmon shumë drejt përfaqësimit sa më të mirë të shqiptarëve”, thuhet në njoftimin e Zyrës së Kryeministrit.
Tutje në njoftim thuhet se Kurti i falënderoi pjesëmarrësit për kontributin e tyre të deritanishëm dhe u dëshiroi sukses në zgjedhje. /Teve1.info/
