Kryeministri Kurti do ta zhvillojë një takim me komandantin e KFOR-it, Ristuccia dhe përfaqësues tjerë të NATO-s, pas raportimeve se Serbia po kontrabandon armë në Kosovë përmes autoambulancave, duke i shkarkuar në Kishën Ortodokse dhe se për këtë është në dijeni edhe KFOR-i
“Për zgjedhje të parakohshme dakord, por duhet përgatitje. Tjetra, për ta larguar kryetarin nga ndërtesa në Leposaviq, kjo bëhet me zgjedhje. Pra pika e parë e kryen edhe të dytën. Ndërkaq sa i përket pikës së tretë, policia jonë është në ndërtesë sepse ju e dini çfarë gjetëm në Zveçan, arsenal për luftë. Ose tash kemi këto informacionet se veturat e ambulancës janë përdorë për të bartuar armatim. Dhe unë sot do ta kem një takim edhe me përfaqësues të NATO-s për këtë gjë. Do ta takoj edhe komandantin e KFOR-it, Ristuccia. Dhe pas gjithë këtyre takimeve edhe me organet tona të sigurisë, do ta japim fjalën tonë përfundimtare”, ka thënë kryeministri në një konferencë për shtyp.
Kurti ka thënë se brenda javës duhet të dihet e vërteta e kësaj çështjeje.
“Tash jemi duke grumbulluar të dhëna. Dhe unë nuk është mirë të jap informacion për informacionin ende të paplotësuar por brenda kësaj jave duhet të dihet kjo çështje. Andaj sot kam një takim ku do të shtrohet edhe kjo temë”, shtoi Kurti.
Ndryshe, misioni i KFOR-it ka reaguar pas pretendimeve të deputetes britanike Alicia Kearns se Serbia po kontrabandon armë në Kosovë përmes autoambulancave, të cilat më pas po shkarkohen në Kishat Ortodokse dhe se për këtë ishte në dijeni KFOR-i.
Në një reagim KFOR-i tha se nuk ka asnjë provë për t’i konfirmuar këto pretendime.
“Prezenca e supozuar e paligjshme e armëve u raportua në shtabin e KFOR-it, por pas hetimeve të mëtejshme për të gjetur konfirmimin e kësaj, nuk doli asnjë provë për atë që u raportua. Nuk ka asnjë dëshmi për kontrabandën e supozuar që ishte kryer përtej vijës kufitare administrative ndërmjet Kosovës dhe Serbisë në Kishën Ortodokse në ambulancë”, ka thënë KFOR-i.
KFOR-i po ashtu thekson se ky lloj aktiviteti i takon sundimit të ligjit, që është përgjegjësi e organizatave të sigurisë së Kosovës.
