Kryeministri Albin Kurti ka pritur sot në takim drejtues dhe përfaqësues të organizatave ndërkombëtare të gazetarëve dhe mediave.
Sipas njoftimit të lëshuar nga Zyra e Kryeministrit, Kurti ka thënë se Kosova ka një mjedis mediatik të larmishëm dhe pluralist, ku liria e shprehjes mbrohet dhe ushtrohet, edhe nëpërmjet kritikës ndaj qeverisë, shkruan Reporteri.net.
“Ai tha se Kosova ka një mjedis mediatik të larmishëm dhe pluralist, ku liria e shprehjes jo vetëm që mbrohet, por edhe ushtrohet – përfshirë nëpërmjet kritikës ndaj qeverisë. Megjithatë, ai vuri në pah shqetësimet për mungesën e transparencës së pronësisë së mediave dhe ndikimin e interesave korporative”, thuhet në njoftim.
Tutje thuhet se Kurti theksoi liria e medias është e një rëndësie fundamentale për Qeverinë.
Në takim kanë marrë pjesë përfaqësues nga Reporterët Pa Kufij (RSF), Asociacioni i Gazetarëve Evropian (AEJ), Federata Evropiane e Gazetarëve (EFJ), Unioni i Transmetuesve Evropian (EBU), Qendra Evropiane për Liri të Shtypit dhe Medias (ECPMF), Indeksi i Censurës, Observatori i Ballkanit dhe Kaukazit Transeuropa (OBCT) dhe Instituti Ndërkombëtar i Shtypit (IPI).
“Pasi i dëgjoi çështjet e ngritura nga përfaqësuesit e organizatave, kryeministri Kurti i falënderoi për vizitën dhe diskutimin, ndërsa shprehu gatishmërinë dhe vullnetin e Qeverisë së Republikës së Kosovës për bashkëpunim”, përfundon njoftimi.
Ndryshe, vjet Kosova e ka shënuar rënien më të madhe në 15 vjetët e fundit në indeksin vjetor për lirinë e shtypit të organizatës Reporterët pa Kufij, duke u renditur në vendin e 99-të në botë nga 180 shtete.
2025’ta, ishte viti i dytë radhazi që Kosova shënoi rënie, pasi në vitin 2024 ra nga vendi i 56-të në atë të 75-të.
Asociacioni i Gazetarëve të Kosovës e kishte parë këtë rënie si reflektim të “politikës së vazhdueshme armiqësore” nga Qeveria Kurti.
“AGK-ja është thellësisht e shqetësuar me këtë renditje, më e ulëta për një dekadë, që prej vitit 2015. Megjithatë, e sheh si reflektim të një politike të vazhdueshme aktive armiqësore të dy vjetëve të fundit të udhëhequr nga Qeveria e partisë politike, Vetëvendosje”, ishte thënë në reagimin e AGK-së.
