Kryeministri i Kosovës, Albin Kurti, nuk është paraqitur sot si dëshmitar në Prokurorinë Speciale.
Zëdhënësja e Prokurorisë Speciale, Liridona Kozmaqi, ka thënë se janë njoftuar nga kabineti qeveritar se kryeministri Kurti është jashtë Kosovës dhe e ka të pamundur t’i përgjigjet sot thirrjes.
“Prokuroria Speciale përmes thirrjes së rregullt e ka ftuar kryeministrin Kurti për intervistim në cilësinë e dëshmitarit për një rast penal, që kjo Prokurori e ka në hetim. Sot, nga kabineti i Qeverisë së Kurtit, Prokuroria Speciale është informuar se Kurti gjendet në udhëtim jashtë vendit dhe e ka të pamundur të paraqitet sot në Prokurorinë Speciale. Prokuroria Speciale konform legjislacionit në fuqi do ta përgatis një ftesë tjetër për kryeministrin Kurti për një datë tjetër”, tha Kozmaqi.
Kryeministri Kurti, ishte ftuar nga Prokuroria Speciale të paraqitet sot në orën 09:30 në cilësinë e dëshmitarit, lidhur me rastin e rezervave shtetërore, në të cilin është e implikuar edhe ministrja e Industrisë, Ndërmarrësisë dhe Tregtisë (MINT), Rozeta Hajdari.
Ndërkohë, edhe numri i lëndës që gjendet në thirrjen dërguar kryeministrit përputhet me atë të rastit të rezervave shtetërore./teve1.info/
