Kryeministri i Kosovës, Albin Kurti, ka thënë se 112 vjet më parë, në Vlorë shqiptarët u bënë bashkë për arritjen e pavarësisë së Shqipërisë.
Kurti ka thënë se mendimtarë, veprimtarë e patriotë lanë një trashëgimi historike e dytyrë kombëtare, që ta duam e ta mbrojmë atdheun.
Kurti i cili bashkë me krerët e shtetit të Shqipërisë mori pjesë në cermoninë shtetërore të ngritjes së flamurit në Vlorë, tha se sot e kemi më të lehtë të bëhemi bashkë e të jemi bashkë.
“112 vjet më parë, në Vlorë shqiptarët u bënë bashkë. Idealet, parimet dhe synimi për arritjen e pavarësisë së Shqipërisë, ishin ç’ka bashkuan mendimtarë e veprimtarë patriotë të kombit më 28 Nëntor 1912. Na lanë një trashëgimi historike e detyrë kombëtare, që atdheun ta duam, ta mbrojmë, ta përparojmë. Sot e festojmë atë ditë, me shumë herë më pak vuajtje sesa në të kaluarën. E kemi më të lehtë sot të bëhemi bashkë, e të jemi bashkë. Sepse duhet të qëndrojmë bashkë. Për sa më shumë zhvillim e demokraci, mirëqenie e prosperitet për qytetarët tanë në Kosovë e në Shqipëri”, ka shkruar Kurti, duke uruar Ditën e Flamurit.
