Kryeministri i Kosovës, Albin Kurti, nuk ka komentuar ardhjen e emisarëve evropianë dhe amerikanë në Kosovë, duke thënë se kërkesat dhe ofertat e tyre do t’i mësojë të shtunën.
Po ashtu, Kurti ka thënë se nuk është Kosova ajo që duhet të ketë masa ndëshkuese.
“Çka do të kërkojnë e çka do të ofrojnë e marrim vesh nesër. Unë mund të them se nuk mund të kemi normalizim pa siguri dhe siguria e Republikës së Kosovës, duhet të jetë prioritet edhe për institucionet e shtetit por edhe për popullin e shoqërinë, për këtë ne punojnë ditë e natë. Në dhjetorin e vitit të kaluar i kishim tri javë 16 barrikada në veri. Më 26 ishte një sulm terrorist ku është vrarë heroi i Kosovës, Afrim Bunjaku. Është jetike për Kosovën, demokracinë, por edhe për Ballkanin Perëndimor në përgjithësi që ata që nuk e kanë ditur ose nuk e kanë kuptuar se kush është Serbia dhe Beogradi zyrtar, më në fund duhet ta bëjnë këtë sepse nuk është Kosova që duhet t’i vënë masa ndëshkuese, por është Serbia ajo që duhet t’i vendosen sanksionet. Ne kemi edhe marrëveshjen bazike të 27 shkurtit dhe aneksin e zbatimit të 18 marsit. Ne kemi qenë përherë konstruktiv, kreativ dhe të përkushtuar, kurrsesi nuk ka faj apo përgjegjësi në anën tonë përse Kosova dhe Serbia nuk i kanë marrëdhëniet normale.”, tha ai.
Kryeministri këto komente i bëri pas vënies së gurthemelit të çerdhes në Godanc të Shtimes, derisa ka shtuar që nuk mund të ketë normalizim pa siguri./teve1.info/.
