Kryeministri Albin Kurti ka paralajmëruar se Serbia po përdor ushtrinë si mjet shantazhi për të mbajtur rajonin e Ballkanit në tension të vazhdueshëm. Ai u bëri thirrje institucioneve ndërkombëtare që të ndëshkojnë këtë qasje destabilizuese.
Në fjalën e tij gjatë mbledhjes së Qeverisë, Kurti theksoi se stërvitjet ushtarake të brigadës 66 serbe me helikopterë dhe parashutistë në zona të banuara me shqiptarë në komunën e Bujanocit përbëjnë një shfaqje të rrezikshme të agresionit.
“Një shfaqje e tillë e forcës ushtarake mbi shtëpi, shkolla dhe qendra mjekësore përbën trysni dhe përpjekje për të frikësuar banorët, si dhe një provokim të hapur ndaj shtetit tonë të pavarur të Republikës së Kosovës”, tha Kurti.
Ai gjithashtu u bëri thirrje shqiptarëve në Preshevë, Medvegjë dhe Bujanoc që të mos bien pre e politikave destabilizuese dhe autokrate të Serbisë.
“Institucionet e Kosovës mbeten vigjilente dhe të gatshme për çdo kërcënim. Por është koha që komuniteti ndërkombëtar të ndëshkojë këtë sjellje që kërcënon paqen dhe sigurinë rajonale”, përfundoi Kurti.
