Përmes një postimi në Facebook, Kurti bëri të ditur se për këtë çështje Ministria e Financave, Punës dhe Transfereve ka përgatitur një projektligj.
“Për vite të tëra, punëtorët e sektorit privat janë lënë anash. Me qeverisjen tonë, kjo ndryshon. Atyre do t’ua sigurojmë pragun e të hyrave që u mundëson një jetë të dinjitetshme. Ende pa i mbushur një vit në qeverisje, kemi filluar ndërmarrjen e hapave të nevojshëm drejt rritjes së pagës minimale.
Si hap i parë është rregullimi i kornizës ligjore, në mënyrë që të evitohen të gjitha pasiguritë ligjore ekzistuese në lidhje me rritjen e pages minimale. Ministria e Financave, Punës dhe Transfereve veçse ka përgatitur projektligjin i cili shpejt do të dalë në konsultime publike”, thuhet ndër tjerash në postim.
Tutje, kryeministri shton se pas propozimit të këtij projektligji, ai do të miratohet në Qeverinë e Kosovës.
