Kryeministri i Kosovës, Albin Kurti, është takuar me ambasadorët e shteteve të QUINT-it dhe Shefin e Zyrës së Bashkimit Evropian në Kosovë.
Në takim është diskutuar për Rregulloren e Bankës Qendrore, e cila pritet të hyjë në fuqi nga 1 shkurti.
Kurti gjatë diskutimit ka theksuar rëndësinë e respektimit të kushtetutshmërisë dhe ligjshmërisë në vend nga të gjithë dhe në të njëjtën kohë respektimit të autoriteteve të pavarura, në këtë rast të Bankës Qendrore.
“Ndër çështjet kryesore të diskutimit ishte ajo rreth Rregullores së Bankës Qendrore që pritet hyjë në fuqi nga 1 shkurti, me theks të veçantë të neni 35 i saj i cili përcakton se valuta e vetme e lejuar të përdoret për kryerjen e transaksioneve të pagesave me para të gatshme dhe në sistemin e pagesave në Republikën e Kosovës është euro, si valutë e vetme sipas nenit 11 të Kushtetutës së Republikës së Kosovës dhe Ligjit për Bankën Qendrore të Republikës së Kosovës”, thuhet në komunikatën e Zyrës së Kryeministrit.
Vendimi i Bankës Qendrore të Kosovës që euroja të jetë valuta e vetme në Kosovë ka nxitur reagimet e ndërkombëtarëve. ShBA-ja, Britania e Gjermania i kanë bërë thirrje Qeverisë ta shqyrtojë vendimin që “përjashton” dinarin.
