Sot po diplomon gjenerata e 60 e Policisë së Kosovës.
Në këtë ceremoni të pranishëm janë kryeministri i Kosovës, Albin Kurti, dhe personalitete të larta shtetërore dhe ndërkombëtare.
Kurti tha se këtë vit policia shënon 25-vjetorin e themelimit të saj.
“Policia jonë po shton dhe përforcon rradhët e saj, duke qenë kështu në nivelin më të lartë të detyrës në zbatim të misionit të saj, për mbrojtje të qytetarëve,sundimin e rendit dhe ligjit dhe ruajtjen e sovranitetit dhe integritetit territorial të Republikës sonë. Jam shumë I lumtur që edhe në këtë gjeneratë, nga 448 kadetë që diplomojnë sot çdo e pesta është grua dhe nga sot e tutje ato do të marrin titullin e zyrtareve policore”, tha Kurti.
Kurti theksoi se kur kanë marrë detyrën si qeveri, buxheti për Policinë e Kosovës ka qenë 91 milionë euro, kurse sot është gati 50 % më i lartë, 135 milionë euro e, si rezultat i tij, kushtet e Policisë së Kosovës janë më të mira.
‘Policia shënon moment të rëndësishëm falë qëndresës dhe përkrahjes së familje tuaja, si Qeveri s’do të ndalemi së mbështeturi Policinë e Kosovës. Misionin për vendin tonë e kemi të përbashkët, çdo sfidë e çdo sukses do të kalojmë bashkë’, shtoi ai.
Ministri i Punëve të Brendshme, Xhelal Sveçla tha se policia e vendit me profesionalizmin e tyre kanë arritur ta ngrisin këtë institucion si më të besueshmin për qytetarët e Kosovës.
Ai theksoi se shërbimi ndaj vendit nuk është asnjëherë i mjaftueshëm kur kujtojmë sakrificën e vazhdueshme të popullit tonë për liri.
Drejtori i Përgjithshëm i Policisë së Kosovës , Gazmend Hoxha tha se diplomimi i kësaj gjenerate tregon përkushtimin e tyre për të tejkaluar të gjitha sfidat për tu bërë pjesë e Policisë së Kosovës.
Ai potencoi se prioritet për Policinë e Kosovës është përmbushja e standardeve, përfaqësimi i të gjitha komuniteteve, diversitet etnik dhe ai gjinor.
Zëdhënësi i gjeneratës së 60-të të Policisë së Kosovës, Florian Shala u shpreh se ky moment i diplomimit është dëshmi e përkushtimit dhe përgjegjësive për të përmbushur me nder dhe dinjitet detyrat që i presin.
Ai u zotua se do të punojnë me përkushtim për të ruajtur besimin që e kanë qytetarët në Policinë e Kosovës.
