Kryeministri Albin Kurti ka thënë se gjatë mandatit të tij janë shtuar vendet e punës dhe janë krijuar skema sociale në mbështetje të studentëve dhe nxënësve nga komuniteti egjiptian.
Sipas tij nga shtatë punëtorë sa ishin të punësuar në administratën publike para mandatit të tij tani janë të punësuar 70 punëtorë nga komuniteti egjiptian.
Kurti ka shtuar se për komunitetet joshumicë janë ndarë 10 milionë euro për të përmirësuar infrastrukturën në zonat ku jetojnë dhe 10 milionë euro janë ndarë edhe për ndërtimin dhe renovimin e shtëpive.
“E kemi rritur mbështetjen për studentë dhe nxënës nga komuniteti egjiptian krahas asaj për qendrat mësimore, dhe i kemi shtuar vendet e punës bashkë me krijimin e skemave sociale në mbështetje të tyre. 10 milionë euro janë dedikuar për të përmirësuar infrastrukturën në zonat ku jetojnë komunitetet joshumicë e 10 milionë euro janë ndarë edhe për ndërtimin dhe renovimin e shtëpive, ku mbi 100 shtëpi të reja janë të ndërtuara e mbi 100 të tjera të renovuara. E nga vetëm shtatë punëtorë nga komuniteti egjiptian që kanë qenë të punësuar në administratën publike para mandatit tonë, sot numërojmë 70 të punësuar. Qeveria jonë është e drejtë, e barabartë dhe gjithëpërfshirëse. Në Treboviq, ishim bashkë me Elbertin me të cilin kemi bashkëpunuar ngushtë e do të vazhdojmë njësoj, për të mirën e vendit e në shërbim të të gjithë qytarëve të Republikës”, ka shkruar ai në Facebook./teve1.info/
