Kështu deklaroi ai gjatë fjalimit të tij në dëgjimin publik për Projektligjin për Liritë Fetare, ku po marrin pjesë edhe kryeparlamentari, Glauk Konjufca e ambasadori amerikan, Jeff Hovenier.
Sipas Kurtit liria e besimit ngërthen të drejtën për të pranuar dhe manifestuar fenë, të drejtën për të pranuar ose refuzuar për të qenë anëtar i një grupi fetar.
Teksa ka theksuar se Kosova qëndron mjaft mirë sa i përket respektimit të lirisë fetare.
“Republika e Kosovës qëndron mjaft mirë sa i përket respektimit të lirisë fetare. Kosova renditet e para në rajon për sundimin e ligjit dhe e dyta në botë për përmirësimin në sundimin e ligjit në vitin 2022 sipas World Justice Project dhe një ndër kategoritë ku Kosova ka shënuar performancën më të mirë është kategoria e garantimit efektiv të lirisë së mendimit dhe të fesë. Edhe në këtë fushë Qeveria synon të arrijë një standard sa më të lartë të mbrojtjes së të drejtave të njeriut. Liria fetare zë një vend të veçantë në një shoqëri të lirë dhe të hapur siç është Republika e Kosovës”, tha ai.
Tutje kryeministri tha se një ndër qëllimet më të rëndësishme të këtij projektligji që po diskutohet sot, është qëllimi i ruajtjes dhe promovimit të pluralizmit fetar.
“Një nga qëllimet më të rëndësishme të projektligjit që do të diskutohet sot është pikërisht qëllimi për të ruajtur dhe promovuar këtë pluralizëm fetar. Projektligji do të ju ofrojë sa më shumë bashkësive të ndryshme fetare mundësinë për tu regjistruar zyrtarisht. Në këtë mënyrë edhe ato bashkësi që janë të vogla e të reja do të përfitojnë të drejta të plota dhe të barabarta me ato që janë më të mëdha dhe kanë histori më të gjatë”, tha Kurti./teve1.info./